Wednesday, May 11, 2011

77 - ખૂબ પૌષ્ટિક, બળ આપનાર ચણા

77 - ખૂબ પૌષ્ટિક, બળ આપનાર ચણા
ચણા ખૂબ લૂખા છે, જેથી તે વાયુ કરે છે, પેટમાં ગડબડ કરે છે. તેથી તેની વાનગીઓને તેલમાં તળવાનો રિવાજ છે.
ચણા સ્વાદે મીઠા, સ્વભાવે ઠંડા, ગુણમાં મેદહર, બલપ્રદ, લૂખા, રોચક, ઝાડાને બાંધનાર, કફહર અને પિત્તહર છે. તે વાત પ્રકોપક છે. લોહીનો બગાડ, તાવ, કમળો, ચામડીના રોગ અને મેદરોગમાં લાભકારક છે.
ચણા ખૂબ પૌષ્ટિક છે. ઘોડાને આ જ દ્રષ્ટિએ ચણાની ચંદી ખવડાવાય છે. ચણા કે ચણાની દાળને પલાળી, ખૂબ ચાવીને ખાવી જોઈએ. તેનો પૂરો લાભ મેળવવા બીજું કશું આચર કૂચર ખાવું ન જોઈએ.
કમળાના રોગમાં ચણા દવાનું કામ કરે છે. શેકેલા ચણા, પલાળેલા ચણા કે બાફેલા ચણા કમળાનો રોગી ચાવીને ખાશે તો ઝડપી ફાયદો કરશે.
કફવાળી ઉધરસમાં શેકેલા ચણા સારા. રાત્રે ખૂબ ઉધરસ આવતી હોય તો શેકેલા ચણા ચાવીને ખાવા, ઉપર પાણી પીવું નહિ તો ઉધરસ બેસી જશે.
માથું દુઃખતું હોય તો શેકેલા ચણા ખૂબ ચાવીને ખાવા અને ઉપર પાણી પીવું નહિ. માથું હલકું પડી જશે. દૂધી-ચણાની દાળનું શાક મેદવાળી વ્યક્તિનો મેદ ઓછો કરશે.

No comments:

Post a Comment